Додека трговците и производителите продолжуваат со ценовните битки, на малопродажната сцена се појавуваат компании што за стимулирање на лојалноста на потрошувачите и за поттикнување на купувањето, трагаат по нови додадени вредности.
Автор: Хариет Коен, сениор аналитичар за малопродажба, ИГД
Според прогнозите на ИГД, постојат пет двигатели кои се предвидува дека ќе внесат динамика на додадена вредност во текот на 2015 година и понатаму.
1.Нови оброк-решенија
Се забележува зголемување на бројот на компаниите што се стремат да обезбедат избор од квалитетни решенија, кои би биле совршен оброк за купувачите.
- Сервисот „Хелоу фреш" нуди достава на оброк-пакети, кои содржат продукти и рецепти за готвење на четири оброци, за двајца или за петмина. Достапни се во одредени продавници на пазарите низ Европа, САД и во Австралија.
- Во норвешкиот ресторан за брза храна „Гот левиерт" функционира слична служба, под раководство на популарниот елевизиски готвач Оле Мартин.
- „Лондон ланч бокс компани" ги услужува лондонските канцелариски работници, секојдневно подготвувајќи им свежи оброци. Потрошувачите кои ќе нарачаат преку интернет до 10 часот, ја добиваат испораката истиот ден до 13 часот, со велосипедска служба.
- За сите оние што сакаат да одат во продавница и да ја одберат својата вечера, германскиот малопродажен трговец „Коххаус" нуди рецепти и соодветни производи за голем избор специјалитети.
Животот на купувачите на многу пазари станува сè подинамичен и побрз, а тоа отвора нови можности за инспирации, иновации и за нови прифатливи решенија за консумација на дневните оброци. Овој процес ќе продолжи да се забрзува, а ќе биде засилен и од развојот на новите интернет-идеи за достава.
2.Помогнете им на луѓето да бидат поздрави!
Здравиот начин на живот и понатаму е на врвот од листата на приоритети, а трговците сè повеќе го вклучуваат во својата агенда како составен дел од стратегијата, што ги храни со дополнителни сила и влијание.
- Американскиот малопродажен синџир „Сејфвеј" на потрошувачите им нуди попуст од 10 отсто кога тие се болни од грип, покажувајќи ја на тој начин амбицијата на трговците да се грижат за здравјето и за благосостојбата на купувачите.
- Шведскиот лидер на пазарот, ИЦА, на децата во маркетите им дозволува да земаат бесплатно парче овошје, како поддршка за здравиот избор на потрошувачите.
- Канадскиот „Собејс" соработуваше со Џејми Оливер во кампања за поттикнување на здравите навики на потрошувачите, со споделување на нивните приказни, фотографии и видеозаписи на „Твитер" и на „Инстаграм" преку хаштагот #BetterFoodFor All.
- Комуникацијата со купувачите, прифаќањето на нивните услови и помагањето во постигнување на нивната цел се одлични начини за придобивање на афинитетот и за продлабочување на односот.
3.Вклучете го купувачот во процесот!
Вклучувањето на купувачот во развојот на брендот станува сè попопуларно.
- Во рамките на кампањата „Do us a flavour" на брендот Lay's, производителот на чипс ги охрабрува Американците да предложат нови, инвентивни вкусови, со шанса победникот да освои 1 милион долари. Lay's ја промовираше кампањата на социјалните медиуми и ги рангираше најдобрите вкусови во секоја американска држава.
- Американскиот трговец „Албертсанс" и брендот житарки Kashi на конкурсот „Oats Made Great" го побараа мислењето на потрошувачите за „совршениот појадок" од овес, овошје и од други состојки. Наградата за најоригинално решение беше подарок-картичка во вредност од 250 долари
- Синџирот аптеки „Рајт аид" ја прошири оваа идеја понатаму со „Innovation Challenge", односно со истражување за оригинални предлози за подобрување на здравјето и на благосостојбата на консументите. Победникот ќе добие надомест од 2.500 долари и авторски права.
Придобивањето купувачи, кои се вклучени во производствениот процес и во новиот процес за развој на производите, е одличен начин, на кој трговците и производителите ќе го покажат високото мислење за нив. А тоа ќе биде уште подобро, ако се зачини со многу забава...
4.Бидете (по)локални!
Локалните извори сè повеќе добиваат значење за трговците, производителите и за купувачите.
- Како дел од определбата за поддршка на локалните производи, „Хол фудс маркетс" нуди кредити за локалните фармери и за „мајсторите со храна"
- Во „Реве" – Словачка, ако купувачот има три или повеќе производи од локално потекло на една трансакција, влегува во изборот за награда од вредносен ваучер од 3.000 евра.
- Во Велика Британија „Вејтроус" ги поддржува земјоделците, занаетчиите и органските одгледувачи и им дава приоритет на регионалните доставувачи.
Постои континуирана можност за трговците да продрат што подлабоко во локалните заедници. Користејќи ги овие параметри, локалното значење се издигнува како еден од клучните фактори за успех на малопродажбата.
5.Значењето на времето и на местото!
Истакнувањето на значењето на времето и на просторот како тактика за продажба, станува сè позначајно, особено за прехранбените продавници и за рестораните.
- Како дел од услугата „М & С фор бизнис", британскиот трговец „М & С симпли фуд" нуди испорака на ручек за бизнисмените во работните денови, со понуда од повеќе од 150 производи.
- Во обид за развивање на импулсивната продажба, јапонскиот трговец „Министоп" нуди кафе со попуст од 20 отсто во периодот од 9 до 12 часот.
- Во Канада, кога корисникот ќе се поврзе на мрежата на „Старбакс" и кога ќе го посети „Твитер", добива бесплатно кафе во замена за неговиот влез во лојалната програма на синџирот кафулиња.
Чекирањето на одредено место и во одредено време, на трговците им овозможува подобро да ги запознаат особеностите и потребите на одредена целна група, а на тој начин подобро го запознаваат и пазарот.
