Четвртата интерактивна Talk IN Business конференција во Македонија, од планираните 10 тематски, успешно се одржа денеска во „Воденица Мулино". Тема на конференцијата беше „Дистрибуција и логистика".
Организатор на регионалниот проект Talk IN Business е магазинот InStore, а македонската редакција успешно го пренесува ова искуство и во земјава.
Четвртата интерактивна конференција Talk IN Business, која е прва на тема – „Дистрибуција и логистика", беше ексклузивна можност на едно место да се сретнат производители, дистрибутери, логистичари, шпедитори, трговци, како и претставници од ИТ-секторот. Од заедничкото дружење произлегоа интересни и корисни решенија за поефикасно работење, како достава на производите до маркетите навечер, користење на ГПС, за координација меѓу дистрибутивните компании со цел намалување на метежот пред маркетите и др. Се зборуваше за позитивните и негативните страни на аутсорсингот во дистрибуцијата, како и за придобивките од иновативните софтверски решенија и во која мера тие придонесуваат за намалување на трошоците и за зголемување на ефикасноста. Меѓу присутните беа: „Кене + Нагел" (Kuehne + Nagel), „Витаминка", „Тинекс", „Кола", „АВТ-интернатионал", „Макпрогрес", „Викторија шпед", „Боми 10 логистик", „Нелт СТ", РСМ, „Сигма СБ", „Мактренд", „Маг комерц", „Пекабеско", „Квехенбергер", „Еуроимпекс" и „Алка дистрибуција".
Конференцијата ја отвори Верица Мартиновска, главен и одговорен уредник на македонскиот InStore. По неа, учесниците имаа можност да ја проследат презентацијата на Нестор Печевски, директор за логистика во „Тинекс", кој зборуваше за „Логистиката и дистрибуцијата во малопродажбата", а стана збор и за новиот логистички центар и решенијата што тој ќе им го понуди на сите партнери на „Тинекс". Во презентацијата на Дино Шкријељ, директор за логистика во „Кола" – „Оптимизацијата на работните процеси", тој зборуваше за придобивките и предизвиците со кои се соочува компанијата при оптимизација на магацинското и дистрибутивното работење и како преку мотивирањето на вработените се постигнува ефикасност и ефективност. По кафе-паузата, следуваше презентацијата на Владимир Трпаноски, комерцијален директор во „Витаминка", кој се претстави со презентацијата „Сопствена дистрибуција кај производствените компании" и преку примери од работењето на компанијата покажа кои се придобивките од сопствената дистрибуција и како успешно може да се синхронизира производството и дистрибуцијата.
Настанот беше поддржан од „Дуна", РСМ, „Маг комерц", Peugeot и „Викторија шпед", а во соработка со Амбасадата на Република Хрватска во Македонија.
Интерактивните Talk IN Business конференции се одржуваат еднаш месечно и на секоја средба се обработува одредена категорија производи од FMCG-секторот. Пред присутните се презентираат вредни информации од фокусирани истражувања на пазарот, анализи на актуелни трендови и проблематики но, пред сè, учесниците имаат можност за споделување на искуствата за категориите.
