Втората интерактивна Talk IN Business конференција во Македонија, од планираните 10 тематски, успешно се одржа денеска во „Воденица Мулино". Тема на конференцијата беше категоријата „Козметика и средства за лична хигиена".
Организатор на регионалниот проект Talk IN Business е магазинот InStore, а македонската редакција успешно го пренесува ова искуство по вторпат и во земјава.
Повеќе од 30 најзначајни претставници од компаниите и од маркетите, кои се задолжени за категоријата „Козметика и средства за лична хигиена", имаа можност да се дружат, да дискутираат и да споделуваат искуства за предизвиците и за развојот на секторот. Меѓу присутните беа: „Унилевер" – Македонија, „Кола", „Колид С тим", „Рептил", „Рамстор", „Нелт СТ", „СП маркет", „Орбико", „Атлантик трејд", „Евростил трејд", „Харбини козметика", „СТ компани", „АВТ-интернатионал", „Тинекс", „Тим поинт" и „Хеар компани".
Конференцијата ја отвори Верица Мартиновска, главен и одговорен уредник на македонскиот InStore, а по неа, на присутните со поздравен говор им се обрати Звјездана Боровац, претставник од Амбасадата на Хрватска во Македонија.
Дистрибутерите и трговците имаа можност да го проследат истражувањето на генералниот менаџер на ГфК, Боге Божиновски на тема „Кој тип дезодоранс е вистинскиот – ролон, спреј или стик", како и анализата на InStore, што ја презентираше Мери Каталиниќ, која гипретстави последните трендови во светот и во Македонија, со фокус на карактеристиките на потрошувачот. По кафе-паузата, следуваше истражувањето „Бренд пулс – категории за козметика", кое беше претставено од Благица Ангелковиќ, менаџер за истражување во „Ипсос".
Конференцијата беше заокружена со оформување на три работни групи, во кои учесниците дискутираа на различни теми: канали на продажба и познавање на потрошувачот; специфики во позиционирањето на категоријата и соработка маркети-дистрибутери; како и рефлексии на светските трендови во Македонија. Заклучоците од групите, беа презентирани и споделени меѓу присутните.
Настанот беше поддржан од „Дуна" и во соработка со Амбасадата на Хрватска во Македонија, ГфК и „Ипсос" – Македонија.
Интерактивните Talk IN Business конференции се одржуваат еднаш месечно и на секоја средба се обработува одредена категорија производи од FMCG-секторот. Пред присутните се презентираат вредни информации од фокусирани истражувања на пазарот, анализи на актуелни трендови и проблематики но, пред сè, учесниците имаат можност за споделување на искуствата за категориите. Циклусот ќе продолжи во јануари 2016 година.
