Утре на Talk IN Business – топли пијалаци за свежи денови

InStore ви ја најавува осмата интерактивна Talk IN Business конференција, на тема „Кафе и топли пијалаци". Конференцијата ќе се одржи утре, во „Воденица Мулино" (Капиштец), во Скопје.

На осмата Talk IN Business ќе бидат презентирани истражувањата на агенциите „Фокус маркетфоршунг" и „Нилсен" – Србија. Со најновите податоци од истражувањата, презентерите ќе дадат подетална анализа на промоциите во флаерите, како и преглед на категоријата во малопродажбата. Свое излагање на тема „Социјални медиуми: уште еден канал за промоција или можност за нови искуства?" ќе има Дарко Булдиоски од интернет-маркетинг академијата на „Clear View".

Осмата конференција Talk IN Business е ексклузивна можност на едно место да се сретнат трговците и најголемите производители и дистрибутери од индустријата за кафе и топли пијалаци. Учесниците ќе имаат можност и за тематски дискусии, во кои преку размена на мислења, искуства и предлози за идно подобро работење, ќе зборуваат на темите: „Дигиталната комуникација на компаниите" и „Културата на пиење кафе и топли пијалаци VS новата генерација купувачи".

Talk IN Business е успешен регионален проект, кој македонската редакција на магазинот InStore првпат го пренесе во Македонија минатата година. Интерактивните Talk IN Business конференции се одржуваат еднаш месечно и на секоја средба се обработува одредена категорија производи од FMCG-секторот. Пред присутните се презентираат вредни информации од фокусирани истражувања на пазарот, анализи на актуелни трендови и проблематики но, пред сè, учесниците имаат можност за споделување на искуствата за категориите.